كيفية المذاكرة بشكل صحيح لضمان الحصول على درجات مرتفعة

بسم الله الرحمن الرحيم

كلنا بتواجهنا مشاكل كتير في المذاكرة تحديداً ايام الثانوية..

-_- سنة العذاب والرعب والخوف للطلبة ولأهالي الطلبة.. لأنه في مصر تعتبر السنة الفاصلة بين حلمك وبين انك تدخل كلية انت مش حاببها..

من ضمن المشاكل دي ..

النسيان، ضغط الاهل كل شوية يقولونا ذاكر ذاكر ، نقرأ الحاجه مش فاهمينها .. ولو فهمناها بنحتاج نحفظها ولو حفظناها بننساها.. غير الدروس اللي كل شوية بنروحها..

ولما بنكون خلاص على ايام الامتحانات بيزيد التوتر.. وبنبص نلاقي في شهرين او شهر على الامتحانات.. اللي بيكون خلص وعايز يراجع وخايف ما يلحقش.. واللي بيكون مراجع وعايز يراجع مرتين ثلاثة.. واللي بيكون لسة ما بدأش خالص ومش عارف حاجه عن المنهج..

وطبعاً علشان المقالة دي تكون شاملة.. فهنركز اكثر على الناس اللي ما بدأتش ومش عارفة تذاكر.. وازاي نتجنب مشاكل وضغوطات الاهل.. وازاي نبطل التوتر والخوف.. والاهم من ده كله ازاي نفهم بسرعة ونحفظ بسرعة ومننساش بسرعة 🙂

 

نبدأ بمشكلة الاهل..

بداية كده كلنا عارفين ان الاهل بيعملوا كده علشان خايفين علينا وعايزين اننا نكون حاجه كويسة جداً
ومفيش حد بيتمنى انه يكون احسن منه غير ابنه..

فنقطة اننا نكره الاهل بسبب حاجه زي كده منتهية..

الاهالي انواع.. في النوع العنيف في التربية اللي بيمشي كل حاجه بضرب وتعنيف..
والنوع المتفاهم.. وده ماشي بمبدأ العقاب والحرمان..
والنواع المتوسط.. اللي شوية تعنيف على شوية تفاهم..
والنوع المتساهل.. وده اللي تقريباً مش فارقة معاه انت هتنجح ولا هتسقط.. فبيسيبك لراحتك.

علشان كده لازم نحدد هدفنا من دلوقتي.. لو انت هدفك كلية معينة لازم تحط هدفك بمجموع اكبر من كده علشان لو اتعرضت لنقص درجات بسبب ظلم في التصحيح وغيره.. تكون ضمنت انك تدخل الكلية اللي عايزها.. وطبعاً الضامن ربنا..

انما لو انت مفيش عندك هدف معين لكلية معينة وعايز تنجح وخلاص علشان تخلص من قرف الثانوية..
انا عايزك تجيب في الثانوية اكبر مجموع.. علشان في الاجازة هتعرف الكلية تحديداً اللي انت عايز تدخلها..

ولما تعرفها هيكون معاك المجموع الكافي اللي يخليك تدخلها.. وبكده تكون مندمتش على انك ضيعت مجهود في الثانوية..

فانت لما تذاكر.. هتذاكر لنفسك قبل اهلك.. لانه مفيش حد من اهلك هينفعك لو فشلت.. او لو حصلك اي حاجه..

واوعى تفتكر ابداً ان الثانوية العامة مقياس.. في ناس كتير ما دخلوش الثانوية العامة وبقوا حاجه كبيرة.. ومش هذكر امثلة لانهم كتار جداً..

نيجي لطريقة التعامل مع الاهل..

بعد ما تحدد نوع اهلك .. هتبدأ تمشي معاه بالاسلوب الآتي..

الاهل بيحبوك دايماً تذاكر.. فتبينلهم فعلاً انك بتتعب.. بينلهم اكبر قدر من الامكان انك قدام الكتاب .. وانت بتذاكر ذاكر بصوت عالي علشان يسمعوك.. ويخرج من دماغهم فكرة انك قاعد بتلعب على الموبايل وغيره..

وتكون ماشي معاهم بمبدأ حاضر ونعم..
وتحاول دايماً تكون مبستم في وشهم ومتكشرش خالص 🙂

نيجي لمشكلة عدم التركيز والنسيان والسرحان وكل شوية تفتح الفيس..

مبدأياً قبل ما اتكلم في النقطة دي لازم تكون فاهم كويس جداً ازاي عقلك بيشتغل..

انت عندك نوعين من الذاكرة.. العقل الباطن والعقل الواعي..

العقل الباطن وده اللي بيتسجل فيه كل العادات اللي متعود تعملها.. من ردود افعال لطريقة كلام لطريقة مشيتك لطريقة نظرتك للحاجات اللي حواليك..

والعقل الواعي هو اللي بتفكر بيه في الوقت الحالي وده بيكون عندك تحكم عليه بنسبة اكبر..

طيب بما ان العقل الباطن قوي جداً كده.. وصعب انك تسيطر عليه.. ازاي هنسيطر عليه؟؟؟

هقول.. انت هتسيطر على عقلك الباطن بانك تتحايل عليه.. بمعنى 🙂

انت دلوقتي متعود انك كل يوم تفتح الفيس.. وتشوف آخر الاخبار .. وتفتح الواتس وتشوف مين باعتلك رسايل.. ولما بتفتح ده او ده بتبدأ تدخل في المود ده وبتنسى نفسك.. وبعد ما تقعد بالساعات.. وتلاقي الوقت ضاع.. تيجي تذاكر.. تلاقي نفسك تعبان ومش قادر تذاكر.. فتقول لاء انا تعبان هنام واصحى اذاكر بكره وتفضل على الموال ده لحد ما تلاقي نفسك ضعت..

طيب والحل ايه؟؟

الحل في النقطة دي انك تبعد عن كل حاجه بتلهيك.. خلي اول يوم تقضيه بعد ما تخلص المقالة دي..

هو يوم عادي تعمل فيه كل حاجه انت بتعملها في يومك العادي.. مع اضافة بسيطة .. وهي انك تكتب كل حاجه عملتها في يومك ده من الصغيرة للكبيرة.. من وقت ما صحيت لحد ما نمت..

وتاني يوم تبدأ تطبق الحلول للمشاكل اللي لقيتها في يومك وهنتدرج للحلول مع بعض هنا..

بعد ما تعرف انت بتقضي في يومك ايه اكثر حاجه.. افلام.. فيس.. نت.. مكالمات في التليفون.. الخ..

هتبدأ تقلل من الحاجه دي على قدر الامكان.. او تمنعها تماماً.. وتبدأ تخلي يومك مليان بحاجات تساعدك على المذاكرة..

يعني لما تيجي تفتح الكتاب وتذاكر متذاكرش على السرير اطلاقا.. اقعد على الارض ولا تقعدش على السرير..

تاني حاجه وانت بتذاكر.. ما تحطش الموبايل جنبك غير لو هتستخدمه في المذاكرة.. زي انك تستخدم الآلة الحاسبة من عليه ويفضل انك تستخدم آلة حاسبة خارجية..

الفون تخليه بس انه يشتغل منبه ليك.. لحاجات مهمة لازم تعملها في اوقات محددة.. في انه يصحيك من النوم في فترة محددة..

بعد ما عرفنا الحاجه اللي بتلهينا عن المذاكرة نبدأ نعوض عن الحاجات اللي كانت سبب في ايحاء غير مناسب للدراسة.. بحاجات بتسبب ايحائات ايجابية للمذاكرة..

حاول تلتزم بصلواتك على قدر الامكان..
ممنوع السهر لأي سبب من الاسباب.. آخرك 11 بليل او 12 بليل.. وده لأن السهر.. بيضعف الذاكرة وبيضعف المناعة وبيضعف التركيز وبيسبب امراض كتير.. وبيخليك عايز تنام طول اليوم ومش مركز..

نيجي لوقت الصحيان.. نحاول نصحى بدري.. يعني لو نصلي الفجر ونبدأ يومنا يبقى افضل.. مقدرناش نصحى في الوقت ده يبقى نصحى 6 او 7 ونبدأ يومنا..

اول ما نصحى من النوم اول حاجه نعملها اننا نشرب كوب مياه على الريق.. ونشربه على السنة.. يعني نشربوا واحنا قاعدين ونشربه على 3 مرات في كل مرة نسمي الله وفي نهاية كل مرة نقول الحمد لله..

نيجي للافطار.. نحاول نفطر بعد ما نصحى بساعة.. نفطر بأكل كتير مش قليل.. ونمشي بمقولة..

افطر ك ملك .. وتغدى ك أمير .. وتعشى ك فقير..

ناكل مثلاً على الفطار بيضة او 2 مسلوقين مع كباية لبن مع شوفان لو قدرتوا تجيبوه.. مع عسل ابيض او اسمر.. وعيش وحلاوة طحينية..

نيجي للغداء.. نحاول نخلي اكلنا معظمه اكل مسلوق او مشوي.. يا ريت نقلل من الاكل اللي مقلي في زيت او نلغيه خالص.. يعني لو هتاكل سمك كله مطبوخ او مشوي.. ما تاكلوش السمك مقلي..

قللوا من الاكلات اللي فيها دهون كتير.. ولو هتاكلوا فراخ مثلاً ركزوا على صدور الفراخ اكثر من اوراك الفراخ..

نيجي للعشاء هيكون عشاء خفيف.. زبادي مثلاً.. او لبن رايب.. حاجات خفيفة..

بالنسبة للتركيز والذاكرة..

كلنا عارفين ان العقل السليم في الجسم السليم.. علشان كده هنخلي جسمنا صحي علشان عقلنا يكون شغال كويس بدون اي تشويش عليه..

طبعاً شرحت حاجات كتير من ضمن الصحة وهكملهالكم .. في اول اسبوع .. بعد الفطار والغداء.. هناخد كبسولة من كبسول اسمه اوميجا 3 بلس.. ده مكمل غذائي ملوش اضرار جانبيه .. بيحتوي على زيت السمك.. وده العلبة منه فيها 3 شرايط .. كل شريط في 10 حبات .. وسعره تقريباً في حدود 42 جنيه..

وثاني اسبوع هناخد منه مرة واحدة بس بعد كل وجبة فطار..

وطبعاً اول اسبوع هناخد منه مرتين علشان نعوض اللي فاتنا.. وبعد كده ثاني اسبوع مرة واحدة بعد الفطار تكفي..

ونخلي كل اسبوع على الاقل وجبة سمك واحدة.. ونحاول نخليهم متوسط 3 وجبات سمك في الاسبوع..

نيجي لنقطة الرياضة.. كل يوم نحاول نتمرن ما لا يقل عن ربع ساعة تمرينات رياضية.. كاردو ..

وهتكون حاجات خفيفة.. جري في المكان.. بطن .. ضغط.. إطالة.. نط حبل..

وحاولوا متزودوش عن ساعة واحدة في اليوم بالنسبة للتمارين الرياضة.. ميعاد التمارين الرياضية هيكون بعد ساعتين من كل وجبة.. ممكن تخلوها مثلاً ربع ساعة من بعد ما تخلص الاكل بساعتين..

ونيجي لنقطة مهمة جداً وهي شرب المياه.. حاولوا تشربوا كل ساعة او ساعتين كوب مياه على الاقل.. وتحاولوا ما تنسوش تشربوه على السنة.. هتلاحظوا تغير كبير جداً.. علشان مش عايز اطول كتير جدا جدا كنت كتبت كل فوايد شرب المياه وفوايد الشرب على السنة..

نيجي للاجهزة الذكية.. التلفزيونات والموبايلات واللابات وغيره.. كل الحاجات دي نحاول نقلل القعدة قدامها قدر الامكان.. علشان دي تقريباً اللي مدمرالنا حياتنا..

حاولوا لو مش هتعملوا حاجه مهمه زي انكم تتفرجوا على فيديوهات تعليمية .. غير كده ما تقعدوش على الشاشات دي اكثر من 4 او 6 ساعات في الاسبوع كله..

كده عرفنا هننام امته وهنصحى امته وهناكل ايه ونشرب امته.. وعرفنا هنتمرن امته وهنتمرن ايه..
والحاجات دي كلها علشان تعلي من تركيزنا وتقضي على الخمول اللي جوانا..

نيجي لأهم نقطة وهي المذاكرة.. واحنا بنذاكر نجيب كراسة او كشكول او ورقة.. ونكتب عليها ورقة السرحان.. كل ما نسرح في حاجه واحنا بنذاكر ونكون عايزين نعملها نمسك الورقة دي ونكتب فيها الحاجه اللي هنعملها.. ونعمل كل الحاجات دي بعد ما نخلص المذاكرة..

اثناء المذاكرة حاولوا يكون في سناكس جنبكم وانتوا بتذاكروا..

زي تفاح.. موز.. فواكه مفيده..

نشوف احنا بنذاكر مادة ايه لأن كل مادة وليها طريقة مذاكرة..

لو هنذاكر مواد محتاجة حفظ.. يبقى نحاول واحنا بنقرأ.. نقرأ بصوت عالي.. نقرأ القطعة اكثر من مرة.. وبعدين نكتبها اكثر من مرة.. خلوا دايماً رقم 14 ده ثابت عندكم.. الحاجه اللي عايزينها تثبت اقرأوها 14 مرة بصوت عالي.. وبعدين اكتبوها 14 مرة.. واهم حاجه تركزوا في كل كلمة بتقولوها علشان تبقوا عارفين انتوا بتقولوا ايه مش مجرد قراءة وخلاص..

نيجي بقى لمواد الفهم.. زي الرياضيات والفيزياء..

دول هنحاول نحل فيهم على قد ما نقدر.. ونركز على الامتحانات بشكل اكبر 😀

طيب كده هنحتاج ادوات للمذاكرة..
الادوات هتكون كالآتي.. فيديوهات شرح.. مذكرات.. امتحانات.. قلم ماركر علشان نحدد بيه الكلمات المهمة..

والادوات دي ثابته لأي مادة سواء علمية او ادبية..

وطبعاً معاهم ورقة السرحان..

مدة المذاكرة هتكون قد ايه؟؟

الحقيقة مفيش مدة محددة الشخص ممكن يذاكر فيها لأنها بتختلف من شخص للتاني..
يعني في ناس ممكن تذاكر لمدة ساعة واحدة اللي بيعادل مذاكرة 4 ساعات ناس تانية بتذاكرها..

طيب ايه بيفرق الناس دول عننا؟؟

ان حياتهم صحيه.. علشان كده شرحتلكم ازاي تخلوا حياتكم صحية علشان التركيز يكون عالي اثناء المذاكرة وميكونش في فرق مابينكم وما بينهم..

هتحاولوا تاخدوا دايماً بريك.. البريك يكون مدته ربع الوقت اللي ذاكرتوا فيه.. يعني لو ذاكرتوا ساعة خدوا بريك ربع ساعة.. ذاكرتوا ساعتين.. خدوا بريك نصف ساعة.. وفي البريك ده افصلوا بقى .. اعملوا حاجه من ضمن الحاجات اللي كنتوا كاتبينها في ورقة السرحان.. اخرجوا اتمشوا.. اياً كان..

وحاولوا ما تذاكروش بعد الاكل مباشرة.. خلوا المذاكرة على الاقل بعد ساعة من الاكل..

وخلوا ربع ساعة كده او 10 دقائق تتمشوا فيها بعد الاكل.

بالنسبة لنقطة النسيان.. دايماً الصور بتفضل في ذاكرتنا مدة اطول من الكلام.. يعني ممكن نعبر اوقات عن جمل معينة برموز ورسموات بسيطة.. مش مهم حد يفهمها غيركم.. بس رموز بمجرد ما تشوفوها تفتكروا علطول الجزئية دي كانت بتتكلم عن ايه 🙂

خلوا دايماً عندكم يقين وامل بربنا.. اوعوا تخافوا من اي حاجه اياً كانت..

تخيلوا مثلاً انتوا بتلعبوا رياضة معينة.. وخايفين تعملوا حركة معينة لحسن تتكسروا..
طول ما انتوا خايفين عمركم ما هتتقدموا بسرعة..
فلو اتحديتوا خوفكم واتكسرتوا.. الألم هيدوم لفترة معينة.. يوم .. اسبوع .. شهر.. سنة.. بس هييجي عليه يوم ويروح.. لكنك هتكون اتحديت خوفك.. لكن لو ما اتحدتش خوفك هتفضل خايف طول عمرك..

اتعود دايماً اياً كان اللي هيحصل بكره انت ما تعرفوش.. انت بس بتعمل اللي عليك والباقي على ربنا..
يعني تفضل تذاكر لحد آخر لحظة ولحد آخر يوم.. ومتيأسش وتحل وتفضل بكامل قوتك.. لحد ما تخلص امتحاناتك.. لكن ماتجيش في نص الطريق وتقول انا مش هكمل.. انا خايف.. الكلام ده كله ملوش لازمة وبيزيد التوتر وبيخلي تركيزك اقل وذاكرتك اضعف.. اتعود دايماً انه مهما حصل فإنت عملت اللي عليك.. وحتى لو دخلت في الامتحان وحليت وجبت مجموع مش عالي.. انت عملت اللي عليك.. هتحس فعلاً انك اجتهدت.. وربنا مش هيضيع مجهودك ده على الفاضي..

كان في احد الاشخاص بيتكلم مع احد اصدقائه فكان بيسأله سؤال.. وكان الحديث كالآتي..
– لو ربنا حققلك اللي نفسك فيه هتعمل ايه؟؟

= هفرح مرة.

– طيب لو ربنا ما حققلقش اللي نفسك فيه هتعمل ايه؟؟

= هفرح 10 مرات

– انت مجنون؟؟ هتفرح 10 مرات لو ربنا ما حققلقش اللي نفسك ايه؟؟

= ايوة هفرح 10 مرات.. لانه لو ربنا ما حققليش اللي نفسي فيه يبقى شايلي حاجه احسن منها بكتير.. وممكن يكون الحاجه اللي نفسي فيها .. هيكون فيها ضرر كبير ليا .. فربنا شايلي دايماً الاحسن ♥

خلي دايماً عندك عزيمة وإرادة وقناعة وشجاعة.. ومهما يحصل استمر وتحدى جميع الظروف.. هتقدر توصل لهدفك..

في خلال الساعات الجاية.. هنرفعلكم شرح لكل المواد.. فيديو.. ومذكرات.. وامتحانات وخلافه..

وهرفعلكم ملف لكتاب صغير اسمه يلا نجيب تقدير.. في كلام كتير من اللي شرحته.. علشان لو نسيتوا الكلام ده في يوم تقدروا تفتحوا الكتاب وتراجعوه.. واهم حاجه اوعوا تنسحبوا واوعوا تخافوا من اي حاجه اياً كانت.. من له اب لا يخاف.. فما بالك بمن له رب  ♥

 

وده رابط تحميل الكتاب

رابط تحميل كتاب يلا نجيب تقدير

ودمتم متفوقين ^_^

اترك رد

لن يتم نشر عنوان بريدك الإلكتروني.

يستخدم هذا الموقع ملفات تعريف الارتباط لتحسين تجربتك. سنفترض أنك موافق على ذلك ، ولكن يمكنك إلغاء الاشتراك إذا كنت ترغب في ذلك. قبولقراءة المزيد